الخـــــــيانه

صفره چفوف أديك وحچيك المسموم
لون أصفر طلع والريح اجت صفره



آنه أدري بصحبتك تالي تطلع نار!!
حرگت كلشي حرگت صحبةالگشره



عساهه ابخت گلبي الماعرف يختار
و العرفني بيك بحظه وبعمره



تذكر من گلتلك لاتلح عالبير؟؟
هسه شلون تشرب طلعت الصخره؟!



وگتلك لاتذب جرتك ماظل ماي
(موكل مره ترجع سالمه الجره)



گطرة ماي روحي ومرهه چفك گيض
طشرهه وبچت وأختنگت الگطره



بعد شتريد مني بيادفو اتلگاك!
اگلك ثلج بعدك صارت الجمره



هسه تريد ترجع من بعد ماراح ...
عمري وشد متاعه وتيهت عمره!!



هيچ انه غشيم وانغلب مرتين؟!
أحبك من جديد وترجع الكره!!



لاتتعب بعد راحت الشاره البيك
من سديت بابك سدوا الحضره



وآنه ألمن بعد فاتح ضريح الشوگ؟!
شباچ الگلب مايحمل العصره



بعيوني گبل جانت الدنيه نجوم
هسه أطشرن واتبدت الگمره



عساهه بذمتك راح احرگ البستان
خلهه تموت جوع جروحك الفقره



إله الموت شفتك بس گلت بيه روح
شوف شگد جبتهه وياك عالفطره



وهسه تريد روحي.. ولازم اكفر بيك
مادامك صنم ماتنحسب كفره
مادامك صنم ماتنحسب كفره]